दक्षिण आफ्रिकेविरुद्धच्या पहिल्याच कसोटी सामन्यात केएल राहुलने दमदार ७० धावांची खेळी केल्याने भारताची धावसंख्या २०८वर पोहोचू शकली. रोहित शर्मा आणि विराट कोहली हे लवकर बाद झाल्यानंतर राहुलने एकहाती किल्ला लढवला. या दमदार खेळीचे भारताचे माजी कर्णधार सुनील गावस्कर आणि रवी शास्त्री यांनी कौतुक केले आहे.
राहुल याच्या खेळीने सुनील गावस्कर खूप प्रभावित झाल्याचे दिसून आले आहे. ‘दीर्घकाळापासून जागतिक क्रिकेट राहुलकडून अशा खेळीची आशा करत होते. सामन्याच्या दुसऱ्या दिवशी आता काहीही घडो, राहुलने केलेली ७० धावांची नाबाद खेळी ही शतकापेक्षा कमी नाही,’ अशा शब्दांत गावस्कर यांनी केएल राहुलचे कौतुक केले आहे.
‘त्याची गुणवत्ता आम्ही दीर्घकाळापासून पाहात आलो आहोत. मात्र गेले आठ-नऊ महिने किंबहुना आयपीएलमध्ये त्याला भयानक दुखापत झाल्यापासून वेगळाच राहुल आम्ही पाहात होतो. मात्र काल पाहिलेल्या राहुलची आम्ही दीर्घकाळापासून प्रतीक्षा करत होतो आणि त्या राहुलला आम्हाला पाहता आले, याचा आनंद आहे. त्याने केलेले अर्धशतक हे एका शतकाच्या तोडीचे आहे,’ असे गावस्कर यांनी स्टार स्पोर्ट्सला सांगितले. दुखापतीतून सावरल्यानंतर केएल राहुलने सर्व प्रकारच्या क्रिकेटमध्ये चांगला खेळ करून दाखवला आहे, असे गावस्कर यांनी सांगितले.
“जेव्हा तुम्ही दीर्घकाळ खेळापासून, तुम्हाला आवडणाऱ्या खेळापासून, ज्या खेळाने तुम्हाला सर्व काही दिले आहे, अशा खेळापासून दूर असता आणि तुम्ही पुनरागमन करता, तेव्हा तुम्हाला एक वेगळा दृष्टिकोन मिळतो. राहुलने नेमके हेच केले आहे, असे दिसते. तो आता याकडे एक काम म्हणून पाहण्याऐवजी, मला वाटते की तो एक खेळ म्हणून आणि आनंद घेण्यासाठी म्हणून त्याकडे पाहात आहे. मी पूर्णपणे चुकीचे असू शकतो, परंतु मला तरी हे दिसत आहे. त्याच्या प्रत्येक हालचालीत खूप सकारात्मकता आहे. पूर्वी तो थोडासा हरवल्यासारखा वाटायचा. ते हरवलेपण आता दिसत नाही,’ असे गावस्कर यांनी सांगितले.
‘श्रेयस अय्यरच्या पाठीला दुखापत झाली आणि त्यामुळे केएल राहुलला ११ जणांमध्ये स्थान मिळाले. परंतु तुम्हाला जीवनात तेच तर हवे आहे. तुम्हाला थोड्या नशिबाची साथ हवी. नंतर तुम्हालाच मेहनत करावी लागते आणि त्याने तेच केले आहे. आता त्याने तिन्ही प्रकारच्या क्रिकेटमध्ये स्वतःला तयार केले आहे,’ असे गावस्कर म्हणाले.
हे ही वाचा:
केएल राहुलने भारताचा खेळ सावरला!
बीसीसीआयचा निर्णय; आयपीएल स्पॉन्सरशिपमध्ये चीनसाठी दरवाजे बंद
महाराष्ट्रात गुंतवणूक आली पण आदित्य ठाकरेंना नाही कळली !
जय श्रीराम: उत्तराखंडमधून १५०० रामभक्त येणार अयोध्येत!
भारताचे माजी मुख्य प्रशिक्षक रवी शास्त्री यांनीही मधल्या फळीतील स्थिती योग्य असल्याचे समजण्यापूर्वी राहुलने अवघड सेंच्युरियन खेळपट्टीवर ज्या सहजतेने खेळ केला, ते पाहून आश्चर्य व्यक्त केले. ‘त्याने सहजच फलंदाजी केली. त्याचे फूटवर्क आश्चर्यकारक होते. कसोटी सामना क्रिकेटमध्ये त्याच्यासाठी हा क्रमांक योग्य असल्याचेही या खेळीवरून दिसून आले. मला वाटते की तो मधल्या फळीत भारतासाठी खूप धावा करेल,’ असा विश्वास रवी शास्त्री यांनी व्यक्त केला.