मुंबईतील जगप्रसिद्ध डब्बावाल्यांची कहाणी आता शालेय विद्यार्थ्यांच्या अभ्यासक्रमात समाविष्ट होणार आहे. केरळ सरकारने मुंबईच्या डबेवाल्यांच्या यशोगाथेला शालेय अभ्यासक्रमाचा भाग बनवण्याचा निर्णय घेतला आहे. इयत्ता ९ वीच्या इंग्रजी अभ्यासक्रमात पाच पानांच्या धड्यात डबेवाल्यांच्या कथेचा समावेश करण्यात आला आहे.
‘द सागा ऑफ द टिफिन कॅरिअर्स’ नावाने हा अध्याय असणार आहे, जो लेखक ह्यू आणि कॉलीन गँट्झर यांनी लिहिला आहे. केरळ स्टेट कौन्सिल ऑफ एज्युकेशनल रिसर्च अँड ट्रेनिंग (एससीईआरटी) ने २०२४ च्या अद्ययावत अभ्यासक्रमात ‘डब्बावाला’ या कथेचा समावेश केला आहे. मुंबईत डबेवाल्याची सुरुवात कशी झाली याचा उल्लेख यामध्ये करण्यात आला आहे.
मुंबईतील डब्बा व्यवसाय १३० वर्षांहून अधिक जुना आहे. १८९० मध्ये याची सुरुवात झाल्याची माहिती आहे. डब्बा विक्रेते मुंबईतील ऑफिस कर्मचाऱ्यांना गरम पदार्थ पोहचवण्याचे काम करतात. त्यांच्या वितरण प्रणालीचे देशातच नव्हे तर परदेशातही खूप कौतुक होत आहे.
१८९० मध्ये पहिले डबा वाहक महादेव हवाजी बच्चे यांनी दादरमध्ये राहणाऱ्या एका पारशी महिलेच्या पतीला डबा देण्याचे काम केले होते. इथूनच याची सुरुवात झाली. मुंबईत डबेवाल्यांची संख्या ५ हजार हून अधिक असून त्यांच्याकडून दररोज २ लाखांहून अधिक डबे पोहचवले जातात. मुंबईत डब्बा विक्रेते खास गणवेश घालून काम करतात. पांढरा रंगाचा कुर्ता-पायजमा, डोक्यावर गांधी टोपी, गळ्यात रुद्राक्ष जपमाळ आणि पायात कोल्हापुरी चप्पल, असा त्यांचा गणवेश असतो.
हे ही वाचा :
चंद्रशेखर बावनकुळेंच्या मुलाच्या गाडीची वाहनांना धडक; चालकाला अटक
इस्रायलकडून गाझामधील मानवतावादी क्षेत्रावर हवाई हल्ला; ४० जण ठार
प. बंगाल: भाजपा बूथ अध्यक्ष विजय भुईया हत्येप्रकरणी एनआयएकडून छापेमारी
‘इस्रायलला पुरविण्यात येणारी लष्करी सामुग्री थांबवता येणार नाही!’
दरम्यान, कोविड-१९ च्या महामारीमुळे डबेवाल्यांच्या कामावर मोठा परिणाम झाला, ज्यामुळे त्यांची संख्या सुमारे दोन हजारांवर आली. आता फक्त तेच लोक हे काम करत आहेत ज्यांना नोकरीची गरज आहे. केरळच्या शालेय अभ्यासक्रमात त्यांचा समावेश झाल्याची माहिती मिळाल्यावर, डब्बावाल्यांनी राज्याच्या शिक्षण विभागाचे आभार मानले.
