महाडच्या तळई गावात दरड कोसळून घडलेल्या दुर्घटनेत ३६ जणांचा मृत्यू झाल्याची घटना ताजी असतानाच आता साताऱ्यातील आंबेघर गावात दरड कोसळली आहे. या दुर्घटनेत १२ लोक मृत्युमुखी पडल्याचे कळते. स्थानिक प्रशासनाने याठिकाणी मदतकार्य सुरू केले आहे. सध्या संपूर्ण महाराष्ट्रात पावसाचे थैमान असून त्यामुळे ठिकठिकाणी अशा दुर्घटना घडत आहेत.
मोरणा विभागातील आंबेघर येथे ही दरड कोसळण्याची घटना घडली आहे. गुरुवारी रात्रीच्या सुमारास घडलेल्या या घटनेत आंबेघर येथील काही घरे या मातीच्या ढिगाऱ्याखाली दबली गेली आहेत. या घटनेची माहिती समजताच ग्रामस्थ घटनास्थळी पोहोचले आहेत. त्याठिकाणी तीन कुटुंबातील लोक रात्रीपासून बेपत्ता आहेत.
मुसळधार पावसामुळे मदत कार्य करताना अनेक अडचणी येत आहेत या भागातील प्रमुख रस्ते पाण्याखाली गेले आहेत. स्थानिक ग्रामस्थांनी तातडीने मदत कार्य सुरू केले आहे. पाटण तालुक्यातील ढोकावळे येथेही घरांची पडझड झाली आहे. मातीच्या ढिगाऱ्याखाली काही लोक अडकल्याचे सांगण्यात येत आहे तर किल्ले मोरगिरी येथेही दरड कोसळल्याने महादेवाचे मंदिर मातीच्या ढिगाऱ्याखाली अडकले आहे. येथील परिसरातील ग्रामस्थांना प्रशासनाने इतरत्र हलवले आहे ही घटना ही गुरुवारी सायंकाळी घडली आहे.
गेल्या चार दिवसांपासून साताऱ्यात मोठा पाऊस सुरू आहे. त्यामुळे अनेक ठिकाणी पूर आला आहे. यापूर्वी कधीच असा पाऊस कोसळला नव्हता आणि पूरही आला नव्हता, असं राज्याचे गृह राज्यमंत्री शंभूराज देसाई यांनी सांगितलं.