दक्षिण मुंबईतील अनेक सिंगल स्क्रीन थिएटर्स अर्थात एकपडदा चित्रपटगृहे एकेक करत बंद होत असताना ग्रॅन्ट रोड परिसरातील ‘शालिमार ‘ हे थिएटर सुरु असून त्याला पन्नास वर्षे पूर्ण झाली आहेत. देव आनंद दिग्दर्शित ‘प्रेम पुजारी ‘ या चित्रपटाने या चित्रपटगृहाचे उदघाटन झाले. मसालेदार मनोरंजक चित्रपटाचे अतिशय हुकमी थिएटर म्हणून शालिमार थिएटरची ओळख निर्माण झाली. मनमोहन देसाई दिग्दर्शित ‘सच्चा झूठा ‘, ‘रामपूर का लक्ष्मण ‘ आणि ‘रोटी ‘ या चित्रपटांनी येथे रौप्यमहोत्सवी यश संपादले यावरुन शालिमार थिएटरची ओळख स्पष्ट होते. कारवा, मै सुंदर हू, ज्योती बने ज्वाला, पापी, याराना, द ग्रेट गॅम्बलर, दुनिया मेरी जेब मे असे अनेक चित्रपट येथे प्रदर्शित झाले. गिरगावपासून आग्रीपाडापर्यंतच्या रसिकांसाठी हे थिएटर अतिशय जवळचे. मॅटीनी शोला येथे कधी जुने तर कधी नवीन चित्रपट प्रदर्शित होत.