क्रिकेटमध्ये काही प्रसंग असे येतात, जेव्हा मोठे फलंदाजसुद्धा आश्चर्यकारकरीत्या बाद होतात. विराट कोहलीच्या विकेटबाबतही असंच झालं! रॉयल चॅलेंजर्स बंगळुरूचा विराट कोहली गुजरात टायटन्सविरुद्धच्या सामन्यात अवघ्या ७ धावांवर बाद झाला आणि आरसीबीचा डाव लयाला गेला. मात्र न्यूझीलंडचा अनुभवी फलंदाज केन विल्यमसन याला फक्त एक “क्रिकेटमध्ये घडणारा प्रसंग” मानतो.
बंगळुरूच्या एम. चिन्नास्वामी स्टेडियमवर कोहलीने पुल शॉट मारण्याचा प्रयत्न केला, पण चेंडू व्यवस्थित लागलाच नाही आणि तो डीप स्क्वेअर लेगवर झेलबाद झाला. हा चेंडू गुजरात टायटन्सच्या डावखुऱ्या वेगवान गोलंदाज अरशद खानने टाकला होता.
या विकेटबद्दल बोलताना विल्यमसन म्हणाला, “तो एक नैसर्गिक शॉट होता, जो विराट नेहमीच खेळतो. कित्येकदा याच शॉटवर त्याने षटकार ठोकले आहेत, पण यावेळी चेंडू सरळ फील्डरच्या हातात गेला. क्रिकेटमध्ये असं कधी कधी होऊन जातं.”
विल्यमसन पुढे म्हणाला, “गुजरात टायटन्ससाठी कोहलीची विकेट खूप महत्त्वाची होती. चिन्नास्वामी स्टेडियमवर तो फार धोकादायक ठरू शकतो. त्याने इथे जवळपास ३,००० धावा केल्या आहेत आणि सामना खेचून नेण्याची क्षमता त्याच्याकडे आहे. त्यामुळे त्याला लवकर बाद करणं गुजरातसाठी गरजेचं होतं.”
आरसीबीने आपल्या पहिल्या दोन सामन्यांत विजय मिळवत दमदार सुरुवात केली होती. पण गुजरात टायटन्सने त्यांची विजयी लय खंडित केली. या सामन्यात खेळपट्टी फलंदाजांसाठी अनुकूल नव्हती, आणि गुजरातच्या संघाने परिस्थितीनुसार स्वतःला चांगलं जुळवून घेतलं.
हेही वाचा :
या पराभवातून आरसीबी काय शिकू शकतो, यावर विल्यमसन म्हणाला, “बेंगलुरू आणि हैदराबादसारख्या मैदानांवर मोठे स्कोअर सहज साध्य होतात, त्यामुळे संघ मोठी धावसंख्या उभारण्याचा प्रयत्न करतात. पण अशावेळी अनेकदा घाई होते. जर सुरुवातीला विकेट्स पडल्या, तर थोडा वेळ स्थिर खेळणं गरजेचं आहे. जर तुमच्याकडे विकेट्स शिल्लक असतील, तर शेवटच्या १० षटकांत १४-१५ धावांचा रनरेट गाठणं अवघड नसतं. आरसीबीला हा विचार करावा लागेल की, त्यांनी मधल्या षटकांत संयमाने खेळलं असतं, तर सामना वेगळ्या स्थितीत जाऊ शकला असता.”
सध्या आरसीबीचं नेतृत्व रजत पाटीदारकडे आहे. त्यांचा पुढील सामना ७ एप्रिल रोजी मुंबईतील वानखेडे स्टेडियमवर मुंबई इंडियन्सविरुद्ध होणार आहे.
