IPL 2025 मध्ये चेन्नई सुपर किंग्ज (CSK) ला आणखी एक दारुण पराभव पत्करावा लागला. शुक्रवारी सनरायझर्स हैदराबाद (SRH) विरुद्ध ५ विकेटने झालेल्या पराभवानंतर, कर्णधार एमएस धोनीने कबूल केले की त्यांचा संघ किमान १५-२० धावांनी कमी पडला.
या पराभवासह, CSKने त्यांच्या ९ पैकी ७ सामन्यात पराभव पत्करला आहे आणि ते पॉइंट टेबलमध्ये सगळ्यात खालील स्थानावर आहे.
सामन्यानंतर धोनी म्हणाला, “मला वाटतं आम्ही विकेट गमावत राहिलो. पहिल्या डावात विकेट थोडी चांगली होती आणि १५४ धावा योग्य नव्हत्या. आठव्या-नवव्या षटकानंतर खेळपट्टी थोडी मंदावली, पण त्यात काही असामान्य नव्हतं. जर रनिंग चांगले असते तर आम्ही आणखी काही धावा जोडू शकलो असतो.”
तो असेही म्हणाला की गोलंदाजांनी प्रयत्न केले, विशेषतः फिरकीपटूंनी चांगली गोलंदाजी केली, पण धावसंख्या कमी होती.
धोनीने संघाची एक मोठी कमतरता दाखवून दिली आणि म्हणाला, “मधल्या षटकांमध्ये फिरकी गोलंदाजांविरुद्ध धावा काढण्यास आपल्याला संघर्ष करावा लागत आहे. आपल्याला एकतर हुशारीने धावा काढाव्या लागतील किंवा मोठे शॉट्स खेळावे लागतील. तिथेच आपण चुकत आहोत. ही षटके खूप महत्त्वाची असतात जिथे ५-१० जास्त धावा काढता येतात.”
हे ही वाचा : पहलगामचा कट पाकव्याप्त काश्मीरमध्ये शिजला?
संघाची मधली फळी डळमळीत असताना, २१ वर्षीय डेवाल्ड ब्रेव्हिसला पहिल्यांदाच संधी मिळाल्यावर त्याने प्रभावित केले. त्याने फक्त २५ चेंडूत ४२ धावा केल्या आणि चार षटकार मारले. त्याचे कौतुक करताना धोनी म्हणाला, “ब्रेव्हिसने शानदार फलंदाजी केली. आम्हाला मधल्या फळीतही अशाच खेळीची गरज होती.”
चेपॉक येथे SRHने CSKला पराभूत करण्याची ही पहिलीच वेळ होती. या हंगामात सीएसकेने त्यांच्या पाच घरच्या मैदानावरील सामन्यांपैकी चार सामन्यांमध्ये पराभव पत्करला आहे. आता पुढचा सामना ३० एप्रिल रोजी चेपॉक येथेच पंजाब किंग्ज विरुद्ध आहे.
