मध्य प्रदेशातील भाजपचे प्रमुख नेते आणि राज्याचे चार वेळा मुख्यमंत्री राहिलेले शिवराज सिंह चौहान यांनी रविवारी केंद्रीय कॅबिनेट मंत्री म्हणून शपथ घेतली. चौहान हे पंतप्रधान नरेंद्र मोदी यांच्या शपथविधीनंतर शपथ घेतलेल्या पहिल्या पाच मंत्र्यांपैकी एक होते. त्यांना कुठले खाते दिले जाईल, याबाबतचा निर्णय नंतर घेतला जाईल.
सन १९५९मध्ये जैत गावात किरार शेतकरी कुटुंबात जन्मलेल्या चौहान यांना लोक प्रेमाने ‘मामा’ आणि ‘भैय्या’ म्हणतात. सन १९७० आणि ८०च्या दशकात आरएसएस आणि विद्यार्थी राजकारणापासून सुरुवात केलेले चौहान यांनी मुख्यमंत्री होण्यापर्यंत मजल मारली.
७०च्या दशकाच्या उत्तरार्धात आणीबाणीच्या विरोधात भूमिगत आंदोलनात त्यांनी सक्रिय सहभाग घेतला होता. त्यावेळी त्यांना काही काळ तुरुंगवासही भोगावा लागला होता. गेल्या वर्षीच्या विधानसभा निवडणुकीत भाजपच्या शानदार विजयानंतर चौहान यांना मुख्यमंत्रिपद देण्यात आले नाही. मोहन यादव यांनी मुख्यमंत्रिपद स्वीकारल्यानंतर चौहान यांना विदिशा येथून लोकसभेची उमेदवारी देण्यात आली. याच मतदारसंघातून त्यांनी १९९१ ते २००४ पर्यंत प्रतिनिधित्व केले होते. यावेळी त्यांनी आठ लाखांहून अधिक मतांच्या फरकाने प्रचंड विजय मिळवला.
चौहान यांनी प्रचंड लोकप्रियता पाहता हा ‘तुमच्या प्रेमाचा विजय’ असल्याचे सांगून आपल्या प्रचंड विजयाचे श्रेय लोकांना दिले. त्यांच्या कल्याणकारी योजना, विशेषत: लाडली लक्ष्मी योजना, २००८, २०१३ आणि २०२३मध्ये मध्य प्रदेशातील भाजपच्या विजयात आणि लोकांची विशेषत: महिलांची वाहवा मिळवण्यात महत्त्वपूर्ण ठरल्या आहेत. चौहान यांचा सत्तेच्या राजकारणात प्रवेश १९९०मध्ये झाला जेव्हा ते पहिल्यांदा बुधनी मतदारसंघातून विधानसभेवर निवडून आले. त्यानंतरच्या वर्षी ते विदिशामधून कारकिर्दीत पहिल्यांदाच खासदार म्हणून निवडून आले.
पक्षाने २००५मध्ये प्रथमच मध्य प्रदेश सरकारचे मुख्यमंत्री म्हणून चौहान यांची निवड केली जेव्हा ते राज्याचे प्रदेशाध्यक्ष होते. बुधनीतून ते पुन्हा आमदार झाले. चौहान यांची ३० नोव्हेंबर २००५ रोजी मध्य प्रदेशचे मुख्यमंत्री होण्यासाठी निवड करण्यात आली. त्यांनी २००५ ते २०१८ आणि पुन्हा २०२० ते २०२३ या काळात मुख्यमंत्री म्हणून काम केले, ज्यामुळे ते सर्वाधिक काळ मुख्यमंत्री बनले.
हे ही वाचा:
भारताच्या गोलंदाजांची जादू चालली; शेवटच्या दोन षटकांत फिरला सामना
जम्मू काश्मीरमध्ये यात्रेकरूंच्या बसवर दहशतवादी हल्ला; नऊ जणांचा मृत्यू
डिसेंबर २०२३मध्ये, जवळपास १७ वर्षे आणि चार वेळा सर्वोच्च पदावर राहिल्यानंतर, त्यांनी भाजपला शानदार विजय मिळवून दिल्यानंतर, मोहन यादव यांना पदभार स्वीकारण्याचा मार्ग मोकळा करण्यासाठी त्यांनी राजीनामा दिला. त्यानंतर, चौहान यांनी विदिशामधून लोकसभा निवडणूक लढवली आणि काँग्रेसच्या प्रताभानु शर्मा यांचा आठ लाखांहून अधिक मतांनी पराभव केला. त्यांच्या मुख्यमंत्रिपदाच्या कारकिर्दीत, लाडली लक्ष्मी, कन्यादान योजना, संबल योजना, लाडली बहना योजना आणि गाव की बेटी यासह त्यांच्या कल्याणकारी उपक्रमांमुळे त्यांना मध्य प्रदेशातील लोकांमध्ये लोकप्रिय प्रतिमा निर्माण करण्यात मदत झाली.
चौहान यांनी भारतीय जनता युवा मोर्चाचे राष्ट्रीय अध्यक्ष, भाजपचे राष्ट्रीय सरचिटणीस आणि भाजपच्या मध्य प्रदेश युनिटचे अध्यक्ष अशा विविध पदांवर काम केले. चौहान यांनी बरकतुल्ला विद्यापीठातून तत्त्वज्ञानात पदव्युत्तर पदवी घेतली असून ते त्यातील सुवर्णपदक विजेते आहेत.