ठाकरे सरकारचा आणखी एक निर्णय शिंदे-फडणवीस सरकारने बदलला
मुंबई महानगरपालिकेच्या निवडणुकीत आपल्या फायद्यासाठी महापालिकेच्या नऊ जागा वाढविण्याचा निर्णय ठाकरे सरकारने घेतला होता. त्यांच्या या निर्णयाला शिंदे फडणवीस सरकराने स्थगिती दिली आहे. आता मुंबई महापालिकेच्या निवडणुका २०१७ नुसार होणार असून मुंबई महापालिकेत केवळ २२७ जागा राहणार आहेत.
ठाकरे सरकारने मुंबई महापालिकेच्या जागांची संख्या २३६ पर्यंत वाढवली होती. ठाकरे सरकारच्या या निर्णयाला भाजपासोबतच काँग्रेसचाही विरोध होता मात्र तरीही हा निर्णय घेण्यात आला होता. काँग्रेस नेत्यांच्या शिष्टमंडळाने मंगळवार, २ ऑगस्ट रोजी उपमुख्यमंत्री देवेंद्र फडणवीस यांची भेट घेऊन मुंबई महापालिकेच्या प्रभागांचे परिसीमन आणि सीमांकन रद्द करण्याची मागणी केली होती. शिवसेनेचे नाव न घेता शिष्टमंडळाचे नेतृत्व करणारे काँग्रेस नेते आणि माजी केंद्रीय मंत्री मिलिंद देवरा म्हणाले की, पक्षाच्या फायद्यासाठी सीमांकन आणि सीमांकन हे “अनैतिक” आणि संविधानाच्या विरोधात आहे. त्यानंतर आज, ३ ऑगस्ट रोजी झालेल्या राज्य मंत्रिमंडळाच्या बैठकीत निर्णय घेत शिंदे फडणवीस सरकारने या निर्णयाला स्थगिती दिली आहे.
शिवसेनेची सत्ता असलेल्या मुंबई महानगरपालिकेने वॉर्डांचे आंतर-लिंकिंग, त्यांची पुनर्रचना आणि सीमांकन इत्यादीद्वारे नागरी संस्थेच्या प्रभागांची संख्या २२७ वरून २३६ पर्यंत वाढवली होती. पण जुन्या प्रभागाच्या आधारे निवडणूक व्हायला हवी, अशी मागणी भाजपाने केली होती.
हे ही वाचा:
नॅशनल हेराल्डचे कार्यालय ईडीकडून सील
अविनाश भोसलेंचा ड्युप्लेक्स फ्लॅट तर छाब्रियांची जमीन जप्त
उदय सामंत हल्ल्याप्रकरणी शहर प्रमुख संजय मोरेंसह पाच जणांना अटक
राष्ट्रकुल स्पर्धेत आणखी दोन सुवर्णपदकांवर भारताची मोहोर
दरम्यान, या वर्षी होणार्‍या नागरी संस्थांच्या निवडणुका लक्षात घेऊन बीएमसीने इतर मागासवर्गीयांसाठी (ओबीसी) जागा राखीव ठेवण्यासाठी गेल्या आठवड्यात लॉटरी काढली होती. आता पुन्हा आरक्षणाची लॉटरी काढावी लागणार आहे.