विरोधी पक्षनेते देवेंद्र फडणवीस यांनी पत्रातून मांडली व्यथा
एसटी कर्मचाऱ्यांच्या हलाखीच्या परिस्थितीवर बोट ठेवत त्यांना तातडीने दिलासा द्या, अशी मागणी भाजपाचे विरोधी पक्षनेते देवेंद्र फडणवीस यांनी मुख्यमंत्री उद्धव ठाकरे यांना पत्र लिहून केली आहे.
फडणवीस यांनी मुख्यमंत्र्यांचे लक्ष वेधण्यासाठी पत्रात म्हटले आहे की, एसटी महामंडळातील कर्मचाऱ्यांना नियमित वेतन मिळत नसल्याने अनेक कुटुंबे प्रचंड आर्थिक संकटात आहेत. कुटुंबाचे अर्थचक्र संकटात सापडल्यामुळे नाईलाजाने एसटी कर्मचाऱ्यांना आत्महत्येसारखए पाऊल उचलावे लागत आहे. अहमदपूर, तेल्हारा, शहादा, कंधार, साक्री याठिकाणी एसटी कर्मचाऱ्यांनी आत्महत्या केल्या आहेत.
एस.टी. कर्मचार्‍यांचे अनियमित वेतन, एस.टी. महामंडळ कर्मचार्‍यांच्या कुटुंबीयांच्या आर्थिक हालअपेष्टा, त्यातून एस.टी. कर्मचार्‍यांच्या होत असलेल्या आत्महत्या, यात तातडीने हस्तक्षेप करून त्यांना दिलासा देण्याबाबत मा. मुख्यमंत्री उद्धव ठाकरेजी यांना पत्र…@OfficeofUT pic.twitter.com/NueP0UVkqa
— Devendra Fadnavis (@Dev_Fadnavis) August 30, 2021
फडणवीस यांनी पुढे नमूद केले आहे की, गेल्यावर्षीही जळगाव येथे वाहक मनोज चौधरी व रत्नागिरी येथे पांडुरंग गडदे या एसटी कर्मचाऱ्यांच्या आत्महत्या झाल्यानंर आपल्याशी पत्रव्यवहार केला होता. पण नाशिक आणि इतर भागात आत्महत्यांचे सत्र सुरूच राहिले. धुळे जिल्ह्यातील साक्री येथे बेडसे या एसटी कर्मचाऱ्याने आत्महत्या करताना लिहून ठेवलेल्या चिठ्ठीत वेतन मिळत नसल्याने आत्महत्या करत असल्याचे स्पष्ट लिहून ठेवले आहे. असे असताना परिस्थिती नीट न हाताळता संताप व्यक्त करणाऱ्या त्यांच्या नातेवाईकांविरोधात पोलिसांनी गुन्हे दाखल केले. या घटनेने राज्यभरात एसटी कर्मचाऱ्यांमध्ये संतापाचे वातावरण आहे.
हे ही वाचा:
आता नव्या उत्पादनांचीही होणार परदेशवारी
अमेरिकेच्या रॉकेटने काबुल विमानतळावरील अनर्थ टळला
एसटी कर्मचाऱ्यांमध्ये असंतोष खदखदत आहे!
‘या’ शिवसेना खासदारावर ईडीचे छापे
फडणवीस यांनी पत्रात पुढे म्हटले आहे की, माझी आपल्याला विनंती आहे की, एसटी कर्मचाऱ्यांच्या व्यथांकडे तातडीने हस्तक्षेप करत लक्ष द्यावे आणि वेतनाच्या समस्येवर तोडगा काढावा. केवळ कर्मचारीच नाहीत तर त्यांचे कुटुंबीयदेखील प्रचंड मानसिक व आर्थिक तणावाखाली आहेत. त्यामुळे आपल्या स्तरावर या गंभीर प्रश्नांची तात्काळ सोडवणूक करावी.
