शिवसेनाचा बालेकिल्ला असलेल्या दादर, प्रभादेवी परिसरात शनिवार, १० सप्टेंबर रोजी मध्यरात्री पक्षप्रमुख उद्धव ठाकरे आणि मुख्यमंत्री एकनाथ शिंदे यांचे समर्थक आमनेसामने आले होते.
शाब्दिक बाचाबाचीनंतर त्यांच्यात हाणामारी झाल्याची माहिती आहे. यावेळी एकनाथ शिंदे यांच्यासोबत असलेले आमदार सदा सरवणकर यांनी पोलीस स्टेशनच्या आवारात गोळीबार केला. यामध्ये विभागप्रमुख महेश सावंत बचावले असल्याचा दावा शिवसेनेने केला आहे. मात्र, सदा सरवणकर यांनी हे आरोप फेटाळून लावले आहेत.
त्यानंतर दादर पोलिसांनी २५ शिवसैनिकांवर गुन्हे दाखल केले आहेत. यामध्ये शिवसेनेचे विभागप्रमुख महेश सावंत यांचाही समावेश आहे. एकनाथ शिंदे यांचे समर्थक संतोष तेलवणे यांच्या तक्रारीनंतर दादर पोलीस ठाण्यात गुन्हा दाखल करण्यात आला आहे. भारतीय दंड कलम १४३, १४७, १४८, १४९, ३९५, ३२४, ३२३, ५०४, ५०६ नुसार गुन्हा दाखल करण्यात आला आहे. त्यानंतर महेश सावंत, शैलेश माळी, संजय भगत आणि इतर दोघांना पोलिसांनी अटक केली आहे.
मध्यरात्री १२.३० वाजण्याच्या सुमारास महेश सावंत, शैलेश माळी, संजय भगत, विनायक देवरुखकर, विपुल ताटकर आदींसह २० ते २५ कार्यकर्ते काठ्या, बांबू, चॉपर घेऊन मारण्यासाठी आल्याचे संतोष तेलवणे यांनी आपल्या तक्रारीत म्हटले आहे.
हे ही वाचा:
शिवसेनेच्या बालेकिल्ल्यात शिंदे- ठाकरे समर्थक आमनेसामने, गोळीबार झाल्याचा दावा
‘याकुब मेमनचा भाऊ रौफसह एका बैठकीत किशोरी पेडणेकर काय करत होत्या?’
राहुल गांधींच्या ४१ हजार रुपयांच्या टी शर्टची चर्चा
बद्रिनाथला मुंबईतील भाविकांची कार दरीत काेसळली आणि
एकनाथ शिंदे यांच्यासोबत गेलेल्या संतोष तेलवणे यांनी गणेश विसर्जना दरम्यान झालेल्या वादाबाबत फेसबुकवर आणि व्हाट्सएपच्या एका पोस्टमध्ये अपशब्द वापरले होते. त्यावरून झालेल्या वादातून शिवसैनिकांनी संतोष तेलावणे यांना शनिवारी मारहाण केली. या प्रकरणानंतर समाधान सरवणकर यांनी प्रभादेवी सर्कलजवळ गोंधळ घातला. दरम्यान सदा सरवणकर यांनी गोळीबार केल्याचा आरोप देखील करण्यात आला मात्र, सदा सरवणकर यांनी हे आरोप फेटाळून लावले आहेत.
