भारताचा आणखी एक मोस्ट वाँटेड दहशतवादी पाकिस्तानमध्ये मारला गेला आहे. लष्कर-ए-तैयबाचा प्रमुख दहशतवादी अदनान अहमद उर्फ हंजला अदनान याची कराचीमध्ये अज्ञात हल्लेखोरांनी हत्या केली. २०१६ मध्ये पंपोरमध्ये सीआरपीएफच्या ताफ्यावर झालेल्या हल्ल्याचा मास्टरमाईंड अदनान अहमद होता. या हल्ल्यात ८ जवान शहीद झाले, तर २२ जवान जखमी झाले होते.
हंजलाने २०१५ साली जम्मूच्या उधमपूरमध्ये बीएसएफच्या ताफ्यावर हल्ला केला होता. या हल्ल्यात बीएसएफचे २ जवान शहीद झाले तर १३ बीएसएफ जवान जखमी झाले होते. या हल्ल्याचा तपास एनआयएने केला आणि ६ ऑगस्ट २०१५ रोजी आरोपपत्र दाखल केले. या दोन्ही हल्ल्यांमध्ये हंजला पाकिस्तानात बसून दहशतवाद्यांना सूचना देण्याचे काम करत होता.
जम्मू-काश्मीरमधील श्रीनगर आणि पुलवामा भागात झालेल्या आत्मघातकी हल्ल्यात हंजलाचा मोठा हात होता. नव्याने भरती झालेल्या दहशतवाद्यांची, विशेषत: जे दहशतवादी भारतात घुसून दहशतवादी हल्ले करण्याच्या तयारीत होते, त्यांची दिशाभूल करण्यासाठी हंजलाला पीओकेमधील लष्कर कॅम्पमध्ये पाठवण्यात आले होते. अदनानला ‘लष्कर कम्युनिकेशन एक्स्पर्ट’ असेही म्हटले जात होते.
हे ही वाचा:
खलिस्तानी दहशतवादी लखबीर सिंग रोडेच्या मृत्यूनंतर त्याचा साथीदार परमजीत सिंग उर्फ धाडीला अटक!
उद्धव ठाकरे म्हणतात, लोकसभा निवडणूक बॅलेट पेपरवर घ्या…
राष्ट्रीय राजपूत करणी सेनेचे अध्यक्ष सुखदेव सिंह गोगामेडी यांना गोळ्या घातल्या
थायलंडमध्ये बस अपघातात १४ जण ठार, २० जखमी!
हंजलाचा मृत्यू हा लष्कर प्रमुख हाफिज सईदसाठी मोठा धक्का मानला जात आहे. अदनान अहमद उर्फ हंजला अदनान हा लष्कर प्रमुख हाफिजच्या जवळचा होता. २-३ डिसेंबरच्या रात्री अज्ञात हल्लेखोरांनी ४ गोळ्या झाडून हे हत्याकांड घडवून आणले. कडेकोट बंदोबस्तात अदनानची हत्या करण्यात आली. सूत्रांनी दिलेल्या माहितीनुसार, अदनान अहमदला त्याच्या सुरक्षित घराबाहेर गोळ्या घालण्यात आल्या, गोळी झाडल्यानंतर त्याला पाकिस्तानी लष्कराने गुप्तपणे कराची येथील रुग्णालयात दाखल केले. मात्र, ५ डिसेंबर रोजी त्यांचे निधन झाले. हाफिजसाठी हा मोठा धक्का मानला जात आहे. हंजलाने अलीकडेच रावळपिंडीहून कराचीला आपला ऑपरेशन तळ हलवला होता.