उपमुख्यमंत्री आणि राज्याचे अर्थमंत्री देवेंद्र फडणवीस पहिल्यांदाच महाराष्ट्राचा अर्थसंकल्प सादर करणार आहेत. अर्थसंकल्प तयार करण्यासाठी त्यांनी थेट जनतेकडून सूचना मागवल्या आहेत. मुंबईत होणाऱ्या महाराष्ट्र विधिमंडळाच्या आगामी अर्थसंकल्पीय अधिवेशनात राज्याचा अर्थसंकल्प मांडला जाईल, असे फडणवीस यांनी म्हटले आहे. हा अर्थसंकल्प तुमचा असून तुमचा सहभाग आवश्यक आहे . अशा परिस्थितीत महाराष्ट्राच्या २०२३ च्या अर्थसंकल्पाबाबत तुमचे विचार आणि सूचना कळवा असे फडणवीस यांनी म्हटले आहे.
केंद्रीय अर्थमंत्री निर्मला सीतारामन यांनी १ फेब्रुवारी रोजी लोकसभेत देशाचा अर्थसंकल्प सादर केला होता. महाराष्ट्र विधिमंडळाचे अर्थसंकल्पीय अधिवेशन २७ फेब्रुवारीपासून सुरू होत आहे. मार्चच्या पहिल्या आठवड्यात अर्थसंकल्प सादर होण्याची शक्यता आहे. त्यासाठी लवकरच व्यवसाय सल्लागार समितीची बैठक बोलावण्यात येणार असून, त्यात अधिवेशनाचे कामकाज ठरवले जाणार आहे.
हे ही वाचा:
मध्य रेल्वे मार्गावर रविवार ५ फेब्रुवारीला मेगा ब्लॉक, जाणून घ्या वेळ…
प्रथमच ५० हजार कोटींपेक्षा अधिकचा बीएमसीचा अर्थसंकल्प
पी. चिदंबरम यांच्या पत्नीची संपत्ती ईडीकडून जप्त
उपमुख्यमंत्री देवेंद्र फडणवीस यांनी मुख्यमंत्री, गृहमंत्री, विरोधी पक्षनेते अशा पदांवर काम केले आहे. मात्र, अर्थमंत्री म्हणून ते पहिल्यांदाच अर्थसंकल्प सादर करणार आहेत. आमदार असताना त्यांनी ‘बजेट कसे पढे’ हे पुस्तक लिहिले आहे. अर्थसंकल्पावर त्यांनी अनेक व्याख्यानेही दिली आहेत. बुधवारी त्यांनी मुंबईत केंद्रीय अर्थसंकल्पावर व्याख्यानही केले. आपला पहिला अर्थसंकल्प जनतेच्या सूचना आणि संकल्पनांचे प्रतिबिंब असावा यासाठी त्यांनी जनतेकडून सूचना मागवल्या आहेत. http://bit.ly/MahaBudget23 या लिंकवर जाऊन लोक त्यांचे मत मांडू शकतात. अशा स्थितीत राज्याच्या आगामी अर्थसंकल्पात जनतेच्या आशा-आकांक्षांचे प्रतिबिंब नक्कीच पडणार आहे.
