पश्चिम बंगालच्या मुख्यमंत्री ममता बॅनर्जी यांच्या विरोधात पोस्ट केल्याच्या आरोपाखाली आणि कोलकाता रुग्णालयात बलात्कार करून हत्या करण्यात आलेल्या प्रशिक्षणार्थी डॉक्टरची ओळख उघड केल्याप्रकरणी एका २३ वर्षीय महाविद्यालयीन विद्यार्थिनीला अटक करण्यात आली आहे. कीर्ती शर्मा असे अटक करण्यात आलेल्या विद्यार्थिनीचे नाव असून कोलकाता पोलिसांनी रविवारी (१८ ऑगस्ट) तिला तिच्या लेक टाऊन येथील घरातून अटक केली.
कीर्ती शर्मावर ३१ वर्षीय महिला डॉक्टरच्या बलात्कार आणि हत्येशी संबंधित इंस्टाग्रामवर तीन कथा शेअर केल्याचा आरोप आहे. पोलिसांनी सांगितले, तरुणीने इंस्टाग्राम पोस्टवर पीडित तरुणीची माहिती प्रसारित केल्यामुळे बलात्कार पीडितेचे चित्र आणि ओळख उघड झाली. हा एक दंडनीय गुन्हा असल्याचे पोलिसांनी सांगितले. याव्यतिरिक्त, मुख्यमंत्री ममता बॅनर्जी यांच्यावर आक्षेपार्ह टिप्पणी केल्याचाही आरोप कीर्ती शर्मावर ठेवण्यात आला आहे.
या प्रकरणी कोलकाता येथील एका पोलीस स्टेशनमध्ये कीर्ती शर्मा विरुद्ध शनिवारी (१७ ऑगस्ट) तक्रार दाखल करण्यात आली होती. तक्रारीनंतर पोलिसांच्या पथकाने रविवारी दुपारी कीर्ती शर्माला अटक केली. दरम्यान, यापूर्वीही एका तरुणाला मुख्यमंत्री ममता बॅनर्जी यांच्या विरोधात पोस्ट केल्याप्रकरणी अटक करण्यात आली होती.
हे ही वाचा..
कोलकाता बलात्कारित तरुणीच्या शवविच्छेदन अहवालातून आले भयानक सत्य समोर
महिलांच्या पाठीशी उभे राहण्यासाठी लाडकी बहिण योजना
रक्षाबंधन सणाच्या गोष्टीवरून सुधा मूर्ती ट्रोल
‘कोलकात्यातील रुग्णालयावर झालेला हल्ला ममता बनर्जी पुरस्कृत’
दरम्यान, महिला डॉक्टर बलात्कार-हत्याप्रकरणी राज्याचा सत्ताधारी पक्ष तृणमूल काँग्रेसने आता या घटनेवर आवाज उठवणाऱ्यांना थेट धमकी दिली आहे. या प्रकरणावरून मुख्यमंत्री ममता बॅनर्जी यांच्या विरोधात सोशल मीडियावर बेताल वक्तव्ये, शिवीगाळ केल्यास अशा लोकांची ओळख पटवून त्यांची बोटे मोडली जातील, अशी धमकी पश्चिम बंगालचे मंत्री उदयन गुहा यांनी दिली.
