टीम इंडियाचा दिग्गज कर्णधार एमएस धोनीची प्रतिष्ठित क्रमांक ७ जर्सी यापुढे इतर कोणत्याही भारतीय खेळाडूला उपलब्ध होणार नाही. धोनीच्या आंतरराष्ट्रीय निवृत्तीनंतर सुमारे ३ वर्षांनी बीसीसीआयने हा निर्णय घेतला. धोनीने त्याच्या संपूर्ण कारकिर्दीत त्याच्या टी-शर्टवर घातलेला नंबर निवृत्त करण्याचा निर्णय घेतला आहे, असे बीसीसीआयने म्हटले आहे.
या अहवालात असे म्हटले आहे की, धोनीची आयकॉनिक क्रमांक ७ जर्सी इतर कोणताही भारतीय क्रिकेटपटू परिधान करणार नाही. आंतरराष्ट्रीय क्रिकेटपटू म्हणून धोनीच्या निवृत्तीनंतर तीन वर्षांनंतर, धोनीने परिधान केलेला नंबर त्याच्या खेळातील योगदानाबद्दल आदरांजली म्हणून धोनीची क्रमांक ७ जर्सी ‘निवृत्त’ करण्यात आली आहे.सन २०१७ मध्ये सचिन तेंडुलकरची सही असलेली १० क्रमांकाची जर्सीही कायमची निवृत्त झाली होती.असा सन्मान मिळवणारा सचिन तेंडुलकरनंतर दुसरा क्रिकेटपटू म्हणून धोनी असणार आहे.धोनीच्या नेतृत्वाखाली टीम इंडियाने २००७ मध्ये T२० विश्वचषक, त्यानंतर २०११ मध्ये एकदिवसीय विश्वचषक आणि त्यानंतर २०१३ मध्ये ICC चॅम्पियन्स ट्रॉफी जिंकली.
बीसीसीआयने टीम इंडियाच्या खेळाडूंना, विशेषतः नवीन पदार्पण करणाऱ्या खेळाडूंना तेंडुलकर आणि धोनीशी संबंधित क्रमांकाचा पर्याय नसल्याचे सांगितले आहे.बीसीसीआयच्या एका अधिकाऱ्याने सांगितले की, नवीन खेळाडूंना महेंद्र सिंग धोनीची ७ क्रमांकाची जर्सी निवडू नका असे सांगण्यात आले आहे.त्याप्रमाणे नवीन पदार्पण करणाऱ्याला ७ क्रमांक मिळू शकत नाही आणि सचिन तेंडुलकर यांचा १० क्रमांक आधीच उपलब्ध क्रमांकाच्या यादीतून बाहेर आहे.
हे ही वाचा:
ब्रिटिश खासदारांकडून पंतप्रधान नरेंद्र मोदींवर स्तुतीसुमने
दहशतवाद्यांचा गड मानल्या जाणाऱ्या पुलवामामध्ये शिवलिंगाची प्रतिष्ठापना!
लाडली बहन योजना ठरली महिला सक्षमीकरणासाठी वरदान!
बीसीसीआयच्या या निर्णयामुळे टीम इंडियाच्या खेळाडूंचे पर्याय आता मर्यादित झाले आहेत.नियमानुसार, आयसीसी खेळाडूंना १ ते १०० मधील कोणतीही संख्या निवडण्याची परवानगी देते.परंतु भारतात पर्याय मर्यादित आहेत.सध्या, टीम इंडियाच्या नियमित खेळाडू आणि स्पर्धकांसाठी सुमारे ६० संख्या चिन्हांकित आहेत.एखादा खेळाडू जवळपास वर्षभर संघाबाहेर असला तरी त्याचा नंबर कोणत्याही नवीन खेळाडूला दिला जात नाही, असे बीसीसीआयच्या एका अधिकाऱ्याने सांगितले.याचा अर्थ असा की नुकतेच पदार्पण करणाऱ्या खेळाडूकडे निवडण्यासाठी सुमारे ३० संख्या आहेत.
२०१७ मध्ये मुंबईचा वेगवान गोलंदाज शार्दुल ठाकूरने १० नंबर परिधान करून मैदानात प्रवेश केला होता. यानंतर चाहत्यांनी त्याला सोशल मीडियावर ट्रोल केले. काही चाहत्यांनी असेही म्हटले होते की शार्दुल सचिन बनण्याचा प्रयत्न करत आहे. यावर रोहितने शार्दुलची खिल्लीही उडवली होती. यानंतर बीसीसीआयने हस्तक्षेप केल्यानंतर ठाकूर यांनी ५४ नंबरचा टी-शर्ट परिधान केला. सध्याच्या भारतीय खेळाडूंमध्ये विराट कोहली १८ क्रमांकाचा टी-शर्ट घालतो आणि रोहित शर्मा ४५ क्रमांकाचा टी-शर्ट घालतो. जो सध्या क्रिकेट चाहत्यांमध्ये सर्वात लोकप्रिय टी-शर्ट नंबर आहे.
दरम्यान, धोनी सोशल मीडियावर सक्रीय दिसत नाही. परंतु कोणत्या ना कोणत्या कारणामुळे धोनी चर्चेत येतो. गुगलने धोनीच्या ट्रेंडमध्ये सहभाग नोंदवत एक मिश्किल टिप्पणी केली होती. गुगलने सोशल मीडियावर एक पोस्ट केली. ज्यामध्ये नंबर सातबद्दल एक खास आहे? असे विचारले असता म्हटले होते, आठवड्याचे दिवस सात, इंद्रधनुष्याचे रंग सात, जगात आश्चर्य सात, मोठे समुद्र सात आणि महाद्वीपांची संख्यादेखील सात आहे, असे म्हटले होते.
धोनीने सात नंबरची जर्सी का परिधान केली?
सात हा आकडा लकी असल्यामुळे या नंबरची जर्सी घालतो, असे काहींना वाटते. ही सगळी अंधश्रद्धा आहे. सात क्रमांक निवडण्यामागे सरळ आणि सोप कारण आहे. माझा जन्म सात तारखेला आणि तोही सातव्या महिन्यात झाला. त्यामुळे मी सात आकडा असलेली जर्सी वापरतो, असे धोनी म्हणाला.
सात क्रमांकाची जर्सी परिधान केलेले खेळाडू
फुटबॉलपासून क्रिकेटपर्यंत अशा अनेक खेळांमध्ये सात नंबरची जर्सी लकी ठरली आहे. जगात अनेक महान खेळांडूनी हा नंबर परिधान केलेला आहे. भारताचा वेगवान गोलंदाज जवागल श्रीनाथ, आफ्रिकेचा शॉन पोलॉक, क्रिस्टियानो रोनाल्डो यांनी ७ नंबरची जर्सी परिधान केलेली आहे.
